BUNG II NA: SUB-COMMITTEE HRANG HRANG

Unit TKP Executive Committee hnuaiah Tualchhuang Kohhran remtihna-in thil tul bik leh mawhphurna a bika nei turin Sub-Committee hrang hrang din a ni. An mawhphurhna leh thuneihna te manual-a lang bak chu Unit TKP Executive Committee-in a tul angin engemaw hun chhung atan a ruat thei ang.  Sub-Committee te term hi Unit TKP term angin kum khat a ni anga, kum laklawhah pawh Executive Committee-in tul a tih chuan eng hunah pawh a thiat(Desolve) in an thuneihna leh mawhphurhna te pawh a tidanglam thei ang. Sub-Committee-te hi Unit TKP Executive Committee hnuaia awm a nih ang takin an hmalak dan pawh Unit TKP Executive Committee hriatpui leh duhdan a ni tur a ni. Sub-Committee te hian anmahni thuin sum tuak leh sum hman theihna an nei lovanga, Executive Committee remtihnain sum an tuakin an hmang thei ang. Sub-Committee hrang hrang leh Colony te hian ‘Record Bu’ an vawng anga, kum tawp ah Unit Secretary hnenah an thehlut ang.

SECTION A: PROPERTY COMMITTEE

1. A din chhan: Unit TKP Property te enkawla vawng him tur leh mumal taka hman a nih theihna tura dante siama kengkawh turin Property Committee hi din a ni.

2. Memberte: Executive Committee-in Executive Committee member zinga mi, Property Committee Convener-ah a ruat anga, Secretary leh member dangte pawh Executive Committee-in a ruat thin ang. Unit TKP President leh Secretary chu Ex-Officio member a ni ang. Convener leh Secretary baka mawhphurhna dangte chu Sub-Committee-in a mamawh dan a zirin Sub-Committee member te zingah chanvo an inbel ang a, Executive Committee-in a pawmpui ang.

3. A tihturte:

(i) Unit TKP Property te a vawng tha ang.

(ii) Unit TKP Property siam that (Repair) ngai a awmin a siamtha (Repair) thin ang.

(iii) Property te hman leh hawhchhuah dan fel takin a siam ang.

(iv) Property chungchanga thil tul danglam bikah chuan Unit TKP Office Bearer te nen inrawnkhawmin thutawp an siam thin ang.

(v) Unit TKP-in Property thar a mamawhte Executive Committee-ah a neih theih dan tur ruahmanna leh rawtna a siam thei ang.

4. Property Rules:

I.

1) TKP Ramzotlang Unit Property te hi Pathian rawngbawlna tur a ni a, Pathian ropuina tur leh a rawngbawlna atan chauh hman tur a ni.

2) R.TKP leh Kohhran programme tibuai thei thil a nih chuan R.TKP property te hi hawh/hman theih a ni lovang.

3) R.TKP Property te hi Property committee phalna la lo chuan hawh/hman phal a nilo.

II.

1) Pawl dang leh mimalin R.TKP property te hi an hmang hawh duh a nih chuan Convener R.TKP Property Committee hnenah dilna siamin hawh man bituk angin  hawh theih a ni ang.

2) Hawh man chu R.TKP Property Committee te hnenah pek tur a ni anga, hawh man hi pek lawk (Pre-paid) tur a ni. Serkawn khaw pawna hawh chhuak tur chuan Security Deposit Rs 100/- an dah thin tur a ni.

3) Property lakchhuah hmain a that leh that loh enfiah a, a zat chhinchhiah leh dahfel pawh property committee memberte hriatpuia tih thin tur a ni.

4) Property hawhchhuah te dah huna an dah loh chuan hawh man rate atanga chhutin nikhatah 50% in a pung ang.

5) R.TKP property te hi hawh a nih a tihbo/tihchhiat a nih chuan a thar leina/siamthatna man a hawhtu te’n an chawi tur a ni ang.

III.

1) R.TKP Musical Instrument leh sound system te hi R.TKP member Dan Puitlinga Innei an awmin man chawi lovin kan kohhran huam chhungah an hmang hawh thei ang. A lakchhuah leh dah luh chungchangah property committee member te hriatpuia tih thin tur a ni.

2) R.TKP property te hi Ramzotlang Tualchhung Kohhran leh a hnuaia Fellowship hrang hrang ten BCM Ramzotlang huam chhungahR.TKP Property Committee te hriatpuina in man chawi lovin an hmang thei ang.

3) A chunga sawi lan loh thil tul bikah chuan R.TKP Office Bearer te leh property committee te inrawnkhawmin thu tawp an siam thin ang.

4) Property Rules te hi a tul angin Executive Committee in a ennawn thin ang.

5) RTKP Property te hi term tawpah audit thin tur a ni anga, Auditor turte chu Executive Committee in a ruat thin ang.

SECTION B: FUND RAISING COMMITTEE

1. A din chhan: Unit TKP member te’n sum tuakna kawngah phur leh chak zawka kan thawhho theihna tura sum tuak chungchang bik ngaihtuah turin ‘ Fund Raising Committee’ hi din a ni.

2. A tihturte: Unit TKP sumtuakna tur a dap anga, a thawh dan tur pawh Unit TKP Executive Committee-ah rawtna a siam thin ang.

Thil tul bikah chuan Unit TKP Office Bearer te  nena inrawn tlangin thutlukna an siam thin ang.

* Fund Raising Committee hmalakna turah hian Unit TKP Planning-a sum tuakna te a tel lovang.

* Executive Committee-in Planning tihhlawhtlinna turin kut leh keah a hmang thei ang.

3. Memberte: Executive Committee-in Executive Committee member zinga mi, Fund Raising Committee Convener-ah a ruat thin anga, Secretary leh member dangte pawh Executive Committee in a ruat thin ang. Unit TKP President leh Secretary chu Ex-Officio member a ni ang.

SECTION C: EVANGELICAL CELL

1. A din chhan: “Unit tinah Anti Drug Cell/ Evangelical Cell din nise” tia MTKP thu dah ding lai bawhzui nan Evangelical Cell hi Unit TKP hnuaiah din a ni. MTKP atanga din tur tih thu tihtawp hun a lo awm pawhin Unit TKP Executive Committee-in tul a tih chuan din chhunzawm zel theih a ni ang.

2. A mawhphurhna: Unit TKP member thlarau lama nun tuihal leh chaute tanpui tur leh TKP member te’n thlarau lam nuna hma kan sawn theih nan hma a la anga, a hmalakna leh ruahmanna a siamte Unit TKP Executive Committee-ah a hriattir thin ang.

3. Hruaitu: Chairman leh Secretary te chu Unit TKP O.B ten an ruat thin ang. Chairman hi Unit TKP Executive Committee member zinga mi a ni tur a ni. Vice-Chairman leh Asst.Secretary chu Evangelical Cell Committee in Evangelical Cell member zinga mi a thlang thin ang.

4. Memberte: Unit TKP memberte a duh apiang Evangelical Cell-ah hian an tel thei anga, TKP member nilo Tualchhung Kohhran member tupawh hemi rawngbawlna ngaipawimawh te chu an tel thei bawk ang. Member inpek/ruat dan tur chu Executive Committee in a ruahman thin ang a, member inpe/ruatte hi Unit TKP Secretary in appointment a pe thin ang.

5. A rawngbawl dan: Unit TKP member leh khawtlanga thlarau nun chhawmdawl ngaite chhawmdawla tichak turin Programme a siam thin anga. Unit TKP hmalakna leh Programme tibuai lovin rawng an bawl thin ang. Unit TKP Executive leh Programme Committee atanga tihtur pekte tihhlawhtlin an tum thin ang. An rawngbawlna leh hmalakna te Unit TKP Executive Committee-ah an report thin ang. Tul bik thilah chuan hruaitu leh Unit TKP Office Bearer te inrawnkhawmin thu an pawtchat thin ang. Tin, Worship Group te nen a tam thei ang ber rawngbawlna an nei ang.

6. Sum hman dan: Unit TKP Executive Committee-in an sum hman theih tur zat a ruahman anga, an hman dan pawh Executive Committee-in a hriatpui thin ang.

SECTION D: PETROS WEEKLY

1. A chhuah chhan: Petros weekly hi RBK Chanchinbu TKP in a enkawl a ni a, Kohhran leh a hnuaia pawl hrang hrangte hmalakna leh hriattirna pawimawhte tarlan nan hman thin tur a ni. Kohhran programme leh hriattirna pawimawh te pawh a tul angin tarlan thin a ni ang. Petros weekly hi thuleh awm hma chuan Pathianni tin chhuah thin a ni ang.

2. A enkawlna sum: Petros weekly enkawl nana sum tuak dan tur, Unit TKP Executive Committee-in kum tirah a duang thin anga; hemi bakah sum indaihlohna avanga sum tuak a tul a nih chuan Executive Committee-in a ngaihtuah ang.

3. A kalphung leh enkawl dan: Petros weekly hi Kohhran Chanchinbu a nih angin a chhunga thute pawh tawngkam mawi leh thudik tak chauh a ni tur a ni; dawt thu leh tawngkam bawlhhlawh te, Kohhran chhungkua leh mimal insawichhiatna thute tarlan loh tur a ni. Politics lam rawngkai thute pawh ziahlan loh tur a ni.  Petros weekly-ah hian chhiatni/thatni chungchanga lawmthusawina leh Advertisement (Kohhran thil nilo) te tihlan loh tur a ni. Chhuah tura thu thehluh te chu Editorial Board-in ngun takin an endik anga, chhuah tlaka ngaih chauh tihchhuah tur a ni. 

4. Board member: Unit TKP President leh Secretary chu Ex-Officio member an ni ang. Editor hi Executive Committee-in Executive Committee member zinga mi a ruat thin ang. Member dangte pawh Executive Committee-in tul a tih zat a ruat thin ang. Tin, Editor hi Programme Committee-ah member a nih sa loh chuan Programme Committee member a ni ang.

5. Inneih sawmna chhuah dan: RBK leh STK member zingah dan puitlinga innei an awmin innei tur ten an duh chuan inneih sawmna card angin chhuahsak ni se. Dantea innei turte chuan sawmna chhuah an duh chuan news item anga chhuahsak theih a ni ang.

SECTION E: WORSHIP GROUP

1. A din chhan: Worship Group hi thalaite (a tul anga Kohhranpui pawh) Pathian fakna leh Chibai bukna (Praise & Worship) lama hma kan sawn theih dan tur kawngte lo dapa min hruaitu atan din a ni.

2. A tihtur: 

(i) Unit TKP-in Praise & Worship Service a neihin a kaihruai thin ang.

(ii) Evangelical Cell nen a tam thei ang berin rawngbawlhona an nei thin ang.

(iii) A tul angin kan Kohhranin Pathian fakna leh chibai bukna kawnga hma a sawn theih nan hma a la ang.

(iv) Tualchhungah ruat an nih angin rawng a bawl thin anga, pawn lama rawngbawlna a neih dawn chuan Unit TKP Executive Committee hriatpuina leh remtihna a ni tur a ni. Tul bik thilah chuan Unit O.B. tenen thu tawp an siam thin ang.

(v) Sum hman mamawhna an neihin Unit TKP Executive Committee-ah an thlen thin ang.

3. Memberte: Worship Group atan Leader pakhat leh member dang a tul zat apiang Unit TKP Executive Committee-in a ruat thin ang.