NANG MALSAWMNA NI ANG CHE

– Rbt.C.Zomuanpuia

‘Nang malsawmna ni ang che’ tih hian midangte tana thiltha tihsaktu, hamthatna thlentu, an mamawh hun leh tanpui an ngaih huna tanpui leh chhawmdawltu tih te pawn a sawifiah theih awm e.

Midangte tana malsawmna nih hi ringtute, mi piangtharte, Lal Isua nei tawhtute tih tur reng a ni. A hnung kan zui leh A rawng kan bawl Lal Isua pawh kha he khawvelah hian Ama tan ni lovin, midangte tan a rawn inpe a, he khawvela rawng a bawl lai khan Midangte tana Malsawmna ni turin damlote  tidamin, mitdelte mit a ti var a, pharte ti thianghlimin a hun a hmang a ni. Ringtute hi he khawvelah hian midang tana malsawmna, midang te tanpuitu kan nih theih dan kawng hrang hrangin sawi tur tam tak a awm ang.

Mi harsa zawk te, tanpui ngai te  kan tanpui hian Lal Isua chunga ti kan ni. Matthaia 25: 31 - 46 kan chhiar chuan chiang takin Lal Isua’n a sawi a, midangte kan tanpui a, riltam te ei tur kan pek a, silh leh fen tur neilo te kan pek te hi Lal Isua’n ka chunga ti in ni, tiin a sawi a. Tanpui ngai te kan tanpui loh hian Lal Isua chunga ti lo kan ni tiin a sawi a ni. Lal Isua nei tute, mi piangtharte kan vanneih em em na chu, mi dangte tana malsawmna kan nih a, an mamawh laia kan tanpui leh kan chhawmdawl hian Lal Isua chunga ti kan nihna hi ani.

Mi dang tana malsawnna kan nih hi vana ro khawlkhawmna a ni.  Marka 10 : 17 – 23 kan chhiar chuan Chatuan nun zawng mi hausa chungchang kan hmu a, Lal Isua hnenah, “Chatuana nunna ka chan theih nan engtin nge ka tih ang?” tiin a zawt a, Lal Isua’n, “Thupek hrang hrang, tualthat suh, uire suh, ru suh, dawtin hek suh, bum suh, i nu leh i pa chawimawi rawh,” tihte zawm turin a lo ti a. Mahse chung thupek zawng zawng chu a naupan lai atanga a zawm tawh thuin a chhang a, Isuan a hnenah chuan, ”Kawng khat i la bak a, kal la i neih apiang hralh la, pachhiate hnenah pe rawh, chutichuan vanah ro i nei ang; tin, lokal la, mi zui ang che,” tiin a sawi a ni.

He khawvel ah chuan kan theih ang tawk in sum leh paite kan khawl thin a, Vanah ro kan khawl ve tawh em le? Pathian thuin min hrilh ang khan, vana ro kan khawl theihna chu, mi harsa te, pachhiate, tanpui ngaite kan tanpui hi ani. 

Kohhranhote, a lian ber atanga a te ber thleng hian midangte tan malsawmna kan ni thei a ni. Kan theih tawk a tam lovin a tlem pawh a ni maithei, kan theih tawk leh kan phak ang tawka midangte tan Malsawmna kan nih theuh theih nan Lalpa’n mal min sawmsak rawh se.